Unbeschwerdie Lewwensfreed, siedländisches Klima, herzlischie Gaschdfreundlichkeid finnense nur bei uns in de Palz.
Es gebbd nix besseres wie Pälzer Woi und die legger pälzisch Kisch. Do gehd nix iwwer den pälzer Saumaache mit Lewwerknebb und Sauergraud und dodezu un en guude pälzer Rieslingschorle.
Uns iss ach keen Weg zu weid, ob zu Fuß oder middm Rad uff unsere viele Wannerduure durch die Woiberge unn zu denne viele Woifeschde, dies alle ridd (Hochdeutsch: “alle ridd”: zu vielen Gelegenheiten) bei uns gebbd.
Fer die Entdecker unner Ihne: Bei uns gebbs an jeder Egg irschend eh Burg oder eh Schloss zu erkunde. Ach unser kulturelles Oohgebood iss ziemlich groß. Allee, zu zwedd oder die ganz Familie – mer henn immer was passendes debei.
Eh Heihleid direggd vor unsrer Deer iss der Woiwannerweg an die römisch Kelder. Zuerschd gehd’s nuffzus an die römisch Kelder. Dord kammer die römisch Tredkelderohlach bestaune. Funn dordd gehds dann niwwer an de greschde römische Herrehauskombleks vunn de Palz.
Dodeno gehds wiedder nunner, an de viele Woireebe entlang, in Richdung Michaeliskabell. Die steht schunn seid em 12. Johrhunnerd derrd unn erinnert an die endschdeung vum Derkemmer Worschdmarkt. Do hodd mer ach un subber Ausblick uff Derkemm mit de Saline unn ehm Wordschmarktgelände mit em riesische Derkemmer Fass, es greschde Woifass uff de ganz Welt.
Nemme sich am beschde eh Veschber (Hochdeutsch; “veschber”: kleine Brotzeit) mit, hogge sich midde in die Woiberge unn geniese se die schee Geschend.
Wann se sisch dann saddgeguggd hawwe, kumme se wieder hääm in unser gemiedlichie Wohnung zum entspanne unn bei e’me guude pälzer Woi die Fiess hoch zu lehje.
Annerschdwu iss annerschd – awwer bei uns isses ähfach schää.
Mer freehn uns wann ner vorbeikumme.
